متعلقه بحلم طاير

متعلقه بحلم طاير فى الهوا....
مش قادره أطير بيه فوق فى السماء
ولا قادره أقف بيه على الأرض
متعلقه بحلم طاير صعب بس مش مستحيل
مادام لسه جوايا الأمل
ومش خايفه مادام بحاول أحققه
ومادام لسه فيا نفس لازم احلم
حتى ولو كان حلم طاير
هأفضل وراه لغايه لما احققه

17/11/2011
أمــل فـــراج

نفسى أصـــرخ وأسالهم...

نفسى أصرخ واسألهم ايه خلاكم تظهروا تانى فى حياتى..!
ليه خلتونى أضعف وأفرح أول ماشفتكم تانى راجعين
وأفتكرت أن أخيراً حسيتوا بيا بعد ما اتألمت فى بعادكم أيام وسنين
ليه رجعتوا مادام هتغيبوا تانى وتبعدوا
أنا كنت اتعودت خلاص على غيابكم
ليه تعلقونى بالأمل وفجأة تخذلوا قلبى تانى وتكسروه
نفسى اصرخ واسألهم ايه خلاكم تظهروا تانى فى حياتى...؟!
17/11/2011
أمــل فــراج

وبشر الصابرين

عندما استمع لقوله سبحانه جل علاه
"إِنَّمَا يُوَفَّى الصَّابِرُونَ أَجْرَهُمْ بِغَيْرِ حِسَابٍ" الزمر 10
" فَاصْبِرْ إِنَّ الْعَاقِبَةَ لِلْمُتَّقِينَ" هود 49،
" واصبروا إن الله مع الصابرين". الأنفال 46
"سلام عليكم بما صبرتم فنعم عقبى الدار" [الرعد/ 24].
اشعر بطمأنينه تجتاح قلبى وتشعرنى بإن مع العسر يسرا
كما قال رب العزه فى كتابه الكريم أن مع العسر يسرا
وأمــــــلى فى الله كبير أن يحقق ما أتمناه
يـــــــــــــــــــارب

8/11/2011
أمــل فـــراج

فيه إيه...؟!!

لكل حكام العرب عامتاً
وللمسئولين عن السلطه
داخل مصر خصوصاً
عايزه أعرف ومن حقى اسألكم
فيه إيـــــــــــــــــه الكرسى.؟!!
يخليكم تتمسكوا بيه
وتخسروا نفسكم وبلدكم
فيه إيــــــــــــــــــــه الكرسى ..؟!!
يخليكم تحاربوا أبناء وطنكم
وتلطخوا ايدكم بدمائهم
فيه إيــــــــــــــــــــه الكرسى ..؟!!
يخليكم عشانه تخسروا الدنيا والأخره
فيه إيــــــــــــــــــــه الكرسى ..؟!!
يخليكم تنسوا ربكم وتخسروا دينكم
حد يجاوبنى فيــــه إيـــــــــــــــه الكرسى..؟!!
عشان تعملوا كل دا علشانه
لان بجد مبقتش لاقيه لسؤالى إجابه

24/11/2011
أمــل فــراج

كفاية بقى

كفاية بقى تقولوا أن اللى
فى ميدان التحرير بلطجيه
البلطجه فيكم ومنكم أنتم
كفاية بقى تقولوا أن اللى
فى الميدان عملاء وخونه
الخيانه فيكم ومنكم أنتم
كفاية بقى تقولوا كلام فذلكه
وحجج وبراهين مفبركه
الكلام هو زى ماهو نمطى
ومفهوش حاجه جديده
عرفنا ان الشعب كله
عُمله وخونه وبلطجه
كل اللى فى الميادين كدا
مادام بيطالبوا بحرية بلدهم
كفاية بقى تخوفوا الشعب
بالاقتصاد اللى بينهار
وبالامان والامن اللى غاب
الشعب خلاص ماعادتش بيخاف
وبقول لكم بصوت عالى
ياللى فاكرين الشعب المصرى مش بيفهم وعبيط
كفاية بقى الاعيب ومماطله وحجج على الفاضى
كفاية بقى فذلكه
وحوارات شبعنا منها

23/11/2011

أمــل فــراج

 

 

كلمات فى حب مصر

ياللى حبك سر غامض مالوش تفسير

ياللى حبك أغلى من أرواحنا وعيونا وشبابنا وأطفالنا

ياللى من أجل حبك تترمى جثثنا فى الزباله ويضيع بصرنا

ياللى اتهانا عشانك كتير حبك بيرجى فى عروقنا

ومهما قالوا علينا بلطجيه او مندسين وضربونا بالقنابل

هندافع عنك بعيونا وبحياتنا لان ببساطه

بـنـحـبــــــــــك يـــــــــــا مــصــــــــــــــــر

23/11/2011
أمــل فــراج